Мәселен, Лионда әзірге көгалды суаруға немесе көлік жууға болмайды. Тыйымды бұзған азаматтарға айыппұл салынуы мүмкін. Оңтүстіктегі Лазурный жағалауында жүзге жуық коммуна су тапшылығына ұшырады.
Құрғақшылық көрсеткіштерінің бірі – су қоймаларының тартылуы. Савойдағы Анси көлінде жаз басталғалы бері су деңгейі 33 см-ге төмендеді. Әзірге бұл жағдай флора мен фаунаға әсер етпеген. Адамдар су көлігімен қатынауға байланысты біраз қиындыққа тап болып жатыр.
Су тапшылығы Еуропаның көптеген аймақтары үшін күрделі мәселеге айналды. Мажарстанда метеорологтар 1901 жылдан бері болмаған құрғақшылық биыл соңғы 7 айда тіркелгенін айтады. Жергілікті Су ресурстары басқармасының мәлімдеуінше, биыл жауын-шашынның орташа мөлшерінің жартысы ғана жауған.
Ұлыбританияда аптап ыстық ауыл шаруашылығына кері әсерін тигізіп жатыр. Фермерлер малға жем-шөп қалмағанын және егінді суару үшін су жетіспейтінін айтады.
Билік өкілдері су тұтынуды шектеп жатса, экологтар батпақтарды қалпына келтіруді ұсынып отыр. Мамандардың айтуынша, бұл шара құрғақшылықпен ұзақ мерзімді күресу үшін жеткілікті ылғал жинауға мүмкіндік береді.
