Рыбакинаға «Уимблдон» турниріндегі жеңісі үшін 2 миллион фунт, яғни 1,1 миллиард теңге тиесілі. Теннисші қаражаттың бір бөлігін қайырымдылыққа және жас спортшыларды қолдауға жұмсайтынын жеткізді.
«Қазақстандықтар әлемнің ең атақты теннисшілерімен сіздің ойыныңызды бақылап отырды. “Үлкен Дулыға” турнирінде жеңіске жетіп, сіз отандастарымыздың үмітін ақтадыңыз, сондай-ақ Қазақстанда теннисті танымал етуге баға жетпес үлес қостыңыз. Бұл жеңіс көптеген жас спортшыларды ынталандырады деп сенемін», — деді Әлихан Смайылов.
Өз кезегінде Елена Рыбакина марапат үшін алғысын білдіріп, қазақстандықтардың қолдауын сезетінін айтты.
«Менің ойымша, турнир ұйымдастырған немесе жас ойыншыларға грант тағайындаған дұрыс болады. Себебі мен жарыс кезінде зор қолдауға ие болдым. Енді жас буынның дамуына менің көмектесетін кезегім келді», — дейді спортшы.
Кездесу барысында теннисші алдағы жоспары туралы да айта кетті.
«Бірнеше күннен кейін АҚШ-та өтетін турнирлерге дайындаламын. Биылғы мақсат — әлемдік рейтингтің ТОП-10 қатарына кіру. Басты мақсат — бірінші болу. Мен бұған ұмтыламын және бар күш-жігерімді саламын», — дейді Елена Рыбакина.
Айта кету керек, кездесу барысында үкімет басшысы теннисшіге II дәрежелі «Достық» орденін табыс етті.
