Науқас 7 қаңтар күні шұғыл түрде ауыр жарақатпен ауруханаға түскен. Жас жігіттің оң қолы иығының жоғары тұсынан бөлініп кеткен.
Бұл қиын отаны дәрігерлер бригадасы екі кезеңмен жүргізді. Бірінші кезеңде ангиохирургтар қан ағымын қалпына келтіру үшін тамырларды тігіп, екінші кезеңде травматологтар бұлшықеттерді, нервтерді, сіңірлер мен сүйектерді қалыпқа келтірді.
«Ота шамамен бес сағатқа созылды. Біз әр отада барлық дене мүшесін мүмкіндігінше сақтап қалуға тырысамыз. Бұл жолы тамыр — жүйке байламына толық ревизия жасау керек болды, тігіс барлық бұлшықеттерге қойылды, өйткені қол толықтай бөлінуге ұшыраған. Бастапқыда қолды сақтап қалу және оның функциясын қалпына келтіру мүмкіндігі аз еді. Отаның сәтті аяқталғанына өте қуаныштымыз», — деді ангиохирург дәрігер Дастан Сабырұлы.
