Мамандардың мәліметінше, еліміздің басым бөлігінде циклон мен атмосфералық фронттардың ықпалы сақталып, әртүрлі қарқындылықтағы жауын-шашын күтіледі. Солтүстік және шығыс өңірлерде қар жауып, кей жерлерде қалың қар түсуі мүмкін.
Ал оңтүстік облыстарда жауын-шашын негізінен жаңбыр түрінде болжанып отыр. Сонымен қатар, бірқатар аймақта екпінді жел күшейіп, боран, көктайғақ және тұман сияқты қолайсыз құбылыстар байқалуы ықтимал.
Синоптиктердің айтуынша, демалыс күндерінің соңына қарай ауа райы жағдайы өзгеріп, батыс өңірлерге антициклон ығыса бастайды.
«Циклоннан кейін Батыс Сібір жазығы аудандарынан антициклон батыс аймақтарға жылжиды. Соның әсерінен жауын-шашын тоқтап, ауа температурасы төмендейді. Түнгі уақытта батыс облыстарда ауа температурасы 10–22 градус аязға дейін, солтүстік өңірлерде 17–25 градус аязға дейін, ал оңтүстікте 0–8 градус аязға дейін төмендейді», – делінген «Қазгидромет» РМК хабарламасында.
Метеорологтардың болжамынша, 23 ақпаннан бастап елдің солтүстік-батысында, ал 24 ақпаннан бастап солтүстік, шығыс және орталық өңірлерде ауа температурасының күрт төмендеуі күтіледі. Кей аймақтарда аяз 25–37 градусқа дейін жетуі мүмкін.
Мамандар тұрғындарға ауа райының күрт өзгеруіне байланысты сақтық шараларын күшейтіп, жолға шығар алдында ресми болжамдарды қадағалап отыруға кеңес берді.
