«Атамекен» Ұлттық кәсіпкерлер палатасының қолдауымен әзірленген жаңа платформа сауда, есеп жүргізу, маркетинг және талдау қызметтерін бір жүйеге біріктіріп, бизнесті басқаруды барынша оңтайландыруды көздейді.
Жоба авторларының айтуынша, BusinessGO кәсіпкерлерге әртүрлі бағдарламалар мен сервистерді жеке-жеке сатып алып, оларды өзара интеграциялау қажеттілігін жояды. Бұл уақытты үнемдеп қана қоймай, бизнес жүргізуге кететін шығындарды айтарлықтай қысқартуға мүмкіндік береді.
Бірнеше жүйенің орнына – бір экожүйе
Бүгінде көптеген кәсіпкерлер онлайн-касса, қойма есебі, фискалдық оператор, маркетингтік құралдар және салықтық сервистер сияқты бірнеше цифрлық платформаны қатар пайдалануға мәжбүр. Мұндай бытыраңқы жүйе қосымша техникалық шығындарды арттырып, бірнеше жеке кабинетпен жұмыс істеуді және әртүрлі техникалық қолдау қызметтеріне жүгінуді талап етеді.
BusinessGO осы мәселені кешенді түрде шешуді ұсынады. Экожүйе бизнесті жүргізуге қажетті негізгі қызметтердің барлығын бір платформаға біріктіріп, кәсіпкерлерге бірыңғай интерфейс пен ортақ техникалық қолдау ұсынады.
BusinessGO құрамына кәсіпкерлік қызметтің түрлі бағытын қамтитын сегіз негізгі сервис енгізілген. Олардың қатарында:
- ФДО – фискалдық деректер операторы;
- GreenKassa – онлайн-касса жүйесі;
- GreenMag – қойма және тауарлық есеп жүргізу платформасы;
- Amian Business – сатылымды арттыруға арналған маркетингтік сервис;
- GreenScan – акциздік маркалар мен өнім таңбаларын тексеру жүйесі;
- «Салық төлеуші паспорты» – QR-код арқылы кәсіпкер туралы ақпаратты тексеру сервисі;
- Tax Free – шетелдік сатып алушылар үшін қосылған құн салығын қайтару қызметі;
- Findex – сауда орталықтары мен базарлардағы сауда қызметін талдауға арналған аналитикалық жүйе.
Мамандардың айтуынша, бұл құралдар кәсіпкерлерге сатылым көлемін ұлғайтып, орташа чекті арттыруға, күнделікті операцияларды автоматтандыруға және бизнесті кез келген жерден онлайн бақылауға мүмкіндік береді.
Көлеңкелі экономиканы азайтуға ықпал етеді
BusinessGO тек бизнесті басқаруға арналған сервис қана емес, сонымен қатар экономиканың ашықтығын арттыруға бағытталған стратегиялық цифрлық жоба ретінде қарастырылып отыр.
Платформа сауда операцияларының ашықтығын қамтамасыз етіп, көлеңкелі экономиканың үлесін азайтуға, заңсыз тауар айналымымен күресті күшейтуге және тұтынушылардың құқықтарын қорғау деңгейін арттыруға мүмкіндік береді.
Сарапшылардың пікірінше, бірыңғай цифрлық инфрақұрылым қалыптастыру шағын және орта бизнестің тиімділігін арттырып, мемлекеттік бақылау мен кәсіпкерлер арасындағы өзара іс-қимылды жаңа деңгейге көтереді.
«Атамекеннің» жаңа бастамасы
«Атамекен» Ұлттық кәсіпкерлер палатасы бұл жоба арқылы Қазақстанның барлық өңіріндегі кәсіпкерлерге қолжетімді әрі заманауи цифрлық инфрақұрылым қалыптастыруды мақсат етеді. Сонымен қатар, бөлшек сауда бойынша нақты аналитикалық деректерді жинақтау арқылы кәсіпкерлікті дамытуға қатысты шешімдердің тиімділігін арттыру көзделіп отыр.
BusinessGO платформасына қосылу рәсімі толықтай онлайн форматта жүзеге асырылады. Ол үшін кәсіпкерлер businessgo.kz порталында электрондық цифрлық қолтаңба (ЭЦҚ) арқылы тіркеледі. Жүйе компания туралы мәліметтерді автоматты түрде анықтап, пайдаланушыға қажетті сервистерді таңдауға мүмкіндік береді.
Жоба туралы толық ақпаратты «Атамекен» Ұлттық кәсіпкерлер палатасының ресми сайтынан немесе 1432 бірыңғай байланыс орталығы арқылы алуға болады.
BusinessGO-ның іске қосылуы Қазақстандағы кәсіпкерлікті цифрландыру үдерісіндегі маңызды қадамдардың бірі саналады. Бірыңғай экожүйе бизнес жүргізуді жеңілдетіп қана қоймай, шағын және орта кәсіпкерліктің бәсекеге қабілеттілігін арттыруға, қызмет көрсету сапасын жақсартуға және экономиканың ашықтығын қамтамасыз етуге бағытталған.
