Америкалық БАҚ Дональд Трамп Флоридадағы гольф-клубынан шығып бара жатқанда оның жанында оқ атылғанын мәлімдеді, деп хабарлайды alataunews.kz.
Трамп атыс болған жерден бірнеше жүз метр қашықта болған, ол дін-аман, бірақ ФТБ бұл оқиғаны «қастандық әрекеті болуы мүмкін» деп мәлімдеді. «Президент Трамп аман», — деп хабарлады оның сайлауалды науқанының коммуникациялар жөніндегі директоры Стивен Чунг.
Оқиғадан төрт сағат өткен соң өткен баспасөз мәслихатында ФТБ, Құпия қызмет және жергілікті полиция өкілдері Трамптың гольф клубының жанында көлікпен қашпақ болған адам ұсталғанын және гольф алаңының жанындағы бұталарда Калашников автоматының тасталғанын айтты.
Президенттер мен экс-президенттерді күзететін Құпия қызмет өкілінің айтуынша, олардың қызметкері бұталардың арасынан шығып тұрған қаруды көріп, әріптестерімен бірге оқ атқан. Содан кейін куәгер бұталардан қара түсті Nissan көлігіне қарай жүгірген адамды көріп, ол көлікке отырып, қашып кеткенін айтқан.
