Полиция мәліметінше, оған енді «екі немесе одан да көп адамды өлтіру» бабымен қатар «қылмысты бірнеше рет жасау» айыбы да қосылған. Бұдан бөлек, іс аясында ұрлық және алаяқтық фактілері де қарастырылып жатыр. Бұл эпизодтар қаза тапқандардың мүлкін жымқыру және малын заңсыз сатумен байланысты.
Адвокаттардың айтуынша, Қылмыстық кодекстің аталған баптары бойынша күдікті 15 жылдан 20 жылға дейін немесе өмір бойына бас бостандығынан айырылуы мүмкін. Істің қоғамда үлкен резонанс тудыруын ескерсек, ең қатаң жаза тағайындалуы ықтимал.
Еске салайық, 2025 жылғы желтоқсанда Жангелдин ауылында бір отбасының төрт мүшесі жоғалып кеткен. Кейін олардың мәйіттері табылып, қылмыстық іс қозғалды.
Күдікті Сұлтан Сәрсемәлиев халықаралық іздеуге жарияланып, ақпанда Индонезияда ұсталды. Кейін тағы екі адамның мәйіті Атырау маңынан табылды.
Қазіргі уақытта іс бойынша тергеу амалдары жалғасып жатыр.
