«Барлық сынақ кезеңдері толық әрі сәтті аяқталды. Қазіргі таңда 18 пойыз тұрақты қатынап жатыр, олардың аралығы шамамен 3,5 минутты құрайды. Жылдамдығы жоғары – бір нүктеден екінші нүктеге жету уақыты өзге көлік түрлерімен салыстырғанда екі есеге жуық қысқа. Пойыздар заманауи, қолайлы әрі жүргізушісіз жүйемен жұмыс істейді.
Ендігі кезекте станциялар маңын абаттандыру жұмыстары жүргізіледі. Бұл бағыттағы жұмыстар кезең-кезеңімен жалғасады. Барлық 15 станцияға жаяу жүргіншілер үшін қолжетімділік қамтамасыз ету жоспарланып отыр, соның ішінде тұрғын үйлер әлі салынып жатқан аудандар да қамтылады. Жаз соңына дейін асфальт төселіп, аумақ толықтай абаттандырылады. Негізгі нысандар – Abu Dhabi Plaza, «Астана Арена», Mega, әуежай және жаңа теміржол вокзалы маңындағы станциялар толық дайын», – деді әкім.
Сонымен қатар, әкім LRT жүйесінің қыс мезгіліндегі жұмысына қатысты алаңдаушылықтарға да жауап берді. Оның айтуынша, биыл қар тазалау техникасы қолданылмаған, себебі ол енді ғана жеткізіліп жатыр. Дегенмен келесі қысқа дейін жүйе толық дайын болады. Сондай-ақ ол рельстерге қар жиналмайтыны атап өтілді.
