Өңір басшысы экологиялық қауіпсіздікке салғырт қарауға болмайтынын айтып, полигон иесін анықтап, заң аясында жауапкершілікке тартуды тапсырды.
Еске салайық, 18 шілде күні полигонда өрт шығып, жалын шамамен 500 шаршы метр аумақты шарпыған. Өртті сөндіруге 45 қызметкер мен 30-ға жуық арнайы техника жұмылдырылып, жалынның кең аумаққа таралуына жол берілмеді.
Мамандар өрттің қайта тұтануының алдын алу үшін жанған аумаққа инертті материалдар төгіліп, Үлкен Алматы каналынан үздіксіз су жеткізілгенін айтады.
Тексеру барысында полигон аумағының жартысы жекеменшік иесіне тиесілі екені белгілі болды. Өрт дәл осы аумақта шыққан. Алайда жер телімінің меншік иесі әлі анықталмаған.
Ал полигонның қалған бөлігін соңғы он жыл бойы «ECO SERVICE GROUP» ЖШС пайдаланып келеді. Компания тұрмыстық қалдықтарды қабылдау және сұрыптау жұмыстарын жүргізеді. Дегенмен облыс әкімінің айтуынша, бұл бағыттағы жұмыстар тиісті деңгейде ұйымдастырылмаған.
Оқиға орнында болған Марат Сұлтанғазиев экологиялық талаптардың сақталмауы тұрғындардың денсаулығы мен қоршаған ортаға елеулі қауіп төндіретінін атап өтті.
«Қатты тұрмыстық қалдықтар полигонында мұндай жағдай қайталанбауы тиіс. Себебі бұл – тұрғындардың қауіпсіздігі мен қоршаған ортаның жай-күйіне тікелей әсер ететін мәселе. Полигондағы барлық талаптың сақталуын бақылауда ұстау керек. Меншік иесін шұғыл анықтап, заң аясында тиісті жауапкершілікке тарту қажет. Экологиялық қауіпсіздікке салғырт қарауға болмайды», – деді облыс әкімі.
Аймақ басшысы аудан әкімдігі мен төтенше жағдайлар қызметіне полигондағы қауіпсіздік талаптарының орындалуын күшейтуді, сондай-ақ мұндай жағдайлардың қайталануына жол бермеу үшін бақылауды қатаңдатуды тапсырды.
Аудан әкімдігінің мәліметінше, қазіргі таңда жағдай толық бақылауға алынған. Өрт толық сөндіріліп, жалынның қайта таралу қаупі жойылған. Полигон штаттық режимде жұмысын жалғастырып жатыр.
