«Мемлекет басшысының тапсырмасын іске асыру аясында халықаралық стандарттарға сәйкес келетін 8 перзентхана, оның ішінде Түркістан облысында – 2 перзентхана салу жоспарлануда», — деді Ажар Ғиният.
Сондай-ақ, еліміздің бас дәрігері «Аңсаған сәби» бағдарламасы аясында Түркістан облысында 100-ден астам нәресте өмірге келгендігін айтып өтті.
«2021 жылдан бастап Қазақстан Республикасы Президентінің тапсырмасы бойынша «Аңсаған сәби» арнайы бағдарламасы іске қосылды. Онда 2026 жылға дейін ЭКҰ-ға жыл сайын 7000 квота бөлу қарастырылған. 2021 жылы Түркістан облысында 453 квота бөлінді. 62 әйел жүкті болып, 106-сы бала туудың бақытына ие болды», — деді министр.
Сондай-ақ, Ажар Ғиният денсаулық сақтау жүйесін кадрлармен қамтамасыз ету туралы айтты. Мәселен, 2021 жылы еліміздің өңірлеріне медициналық жоғары оқу орындарының 3050 түлегі бөлінді. Оның ішінде Түркістан облысына – 180 түлек жіберілген. Ал, биыл 170 түлек жіберу жоспарланып жатыр.
2025 жылға қарай республикалық бюджет есебінен гранттар саны 2000-ға дейін және жергілікті бюджет қаражаты есебінен 1500-ден астам грант ұлғайтылатын болады.
