Талдықорғандықтар саяси қуғын-сүргін құрбандарын еске алу күніне орай ғылым жолында тер төгіп, өз елінің тарихы мен зиялыларын дәріптегені үшін қуғын-сүргінге тап болған құлагер ақын Ілияс Жансүгіровтің рухына тағзым етіп, ескерткішіне гүл шоқтарын қойды.
Ескерткіш жанына облыс әкімі Қанат Бозымбаев, ақынның немере қарындасы Нұрпан Жансүгірова, «Ілиястану» ғылыми-зерттеу орталығының меңгерушісі Мұратбек Иманғазинов және облыстық ардагерлер кеңесінің төрағасы Ермек Келемсейіт жиналып, репрессия құрбандарының өмір жолдары туралы сыр шертісті.
«90 жылдарда Ілияс Жансүгіровтың Жаңалық ауылында жерленгені туралы ақпарат пайда болды. Сол ақпарат туралы зерттеу жүргізгенде ол жерде екі жарым мың адам жерленгенін білдік. Бірақ Ілияс қайда екенін біз нақты айта алмаймыз. Онымен бірге Жұмат Шанин мен Бейімбет Майлин жатыр», — деді Ілиястанушы.
Жиыннан кейін облыс әкімі мешітте болып, қуғын-сүргін құрбандарының рухына арнап құран бағыштады.
Тарихқа жүгінсек, аймақта 4125 адам «халық жауы» атанып, өлім жазасына кесілген. Ал елімізде 103 мыңнан астам адам қуғынға ұшырап, 25 мыңнан астам адам атылып кеткен.
