Ведомство мәліметінше, 2026 жылғы 9 қаңтарда Қазақстан Республикасының Әділет министрлігі Ұлттық экономика министрлігі әзірлеген типтік жерлеу ережелері мен қабірді күту ісін ұйымдастыру тәртібіне өзгерістер енгізуді көздейтін бұйрықты тіркеген.
«Жаңа ережелер крематорийлер қызметіне құқықтық негіз қалыптастырады және Қазақстанда кремацияны алғаш рет заң аясында жүргізуге мүмкіндік береді», – делінген басқарманың баспасөз қызметі таратқан хабарламада.
Бұйрық күшіне енгеннен кейін Алматы қаласындағы крематорий барлық санитарлық және құқықтық талаптар сақтала отырып жұмысын бастайды.
Қазіргі таңда қаладағы патологоанатомиялық бюроның қадағалау кеңесі арқылы кремация қызметтерінің баға тізбесі бекітілу үстінде. Қызмет көрсету тәртібі мен тарифтер кейін ресми сайтта жарияланатыны айтылды.
Айта кетейік, Алматыда крематорий салу жоспары алғаш рет 2020 жылдың жазында жарияланған болатын. Құрылыс аяқталғаннан кейін нысанды іске қосу мерзімі бірнеше рет кейінге шегерілді. Қала әкімдігі мұны крематорий қызметін реттейтін санитарлық нормалардың болмауымен және объекті пайдалануға берілген соң оның соңғы баланстық иесін анықтау қажеттілігімен түсіндірген еді.
