Оқиға 31 тамызда Алматы – Қорғас ақылы автомобиль жолының 120-шақырымында, «Шелек» бақылау аркасының маңында болған.
«ҚазАвтоЖол» ҰК мәліметінше, алдын ала дерек бойынша жүк көлігі шанағы көтерілген күйде қозғалған. Бақылау аркасының астынан өтіп бара жатқан кезде көліктің шанағы конструкцияға соғылған. Салдарынан қозғалыс бағыттарының біріндегі бақылау аркасының бір бөлігі зақымданды.
Оқиғадан кейін жол қызметтері жедел түрде аталған учаскеге жетіп, қозғалыс қауіпсіздігін қамтамасыз ету және жолды қалпына келтіру бойынша қажетті шараларды қабылдады.
Қазіргі уақытта тасжолдағы көлік қозғалысы толық қалпына келтіріліп, қалыпты режимде жүріп жатыр.
Алдын ала ақпарат бойынша, жол-көлік оқиғасынан зардап шеккендер жоқ. Апаттың нақты себептері мен мән-жайын құзырлы органдар анықтап жатыр.
