Ішкі істер министрлігінің мәліметінше, жүйе көлік құралының бақылау аймағына кірген және одан шыққан уақытын тіркейді. Жүріп өткен арақашықтық пен жұмсалған уақыт негізінде көліктің орташа жылдамдығы автоматты түрде есептеледі.
Осылайша жүргізушілердің камера алдында ғана жылдамдықты төмендетуі жеткіліксіз. Олар тасжолдың бүкіл бақыланатын учаскесінде белгіленген жылдамдық режимін сақтауы тиіс.
Министрлік қала сыртындағы жолдарда, әсіресе қозғалыс қарқыны төмен әрі жол түзу болған жағдайда жүргізушілердің жылдамдықты байқамай асырып жіберуі мүмкін екенін ескертеді. Ал жылдамдықты шамадан тыс арттыру ауыр жол-көлік оқиғаларының негізгі себептерінің бірі болып отыр.
Сондай-ақ қараша айында күннің ерте батуы, көктайғақ, тұман мен қардың түсуі жол қозғалысы қауіпсіздігіне қосымша қауіп төндіреді.
Осыған байланысты ІІМ жүргізушілерді белгіленген жылдамдық режимін сақтауға, ауа райы мен жол жағдайын ескере отырып, қауіпсіз жылдамдықты таңдауға шақырады.
Айта кетейік, 9 қарашадан бастап орташа жылдамдықты бақылау жүйесі Алматы – Қорғас тасжолымен қатар Қарағанды – Бурылбайтал және Қызылорда – Арал бағыттарында да іске қосылды.
