Жиын барысында ҚР Бас Прокурорының бірінші орынбасары Тимур Тәшімбаев Алматы облысының жаңа прокурорын таныстырды. Және оның алдында тұрған міндеттерді атап өтіп, жол қозғалысы қауіпсіздігі, шекара маңындағы аудандарда тәртіп орнату мәселесінің қордаланып қалғанын жеткізді.
Одан кейін ҚР Ішкі істер министрінің бірінші орынбасары Марат Қажаев Алматы облысы полиция департаментінің жаңа бастығын таныстырды.
«Президент Әкімшілігінің келісімі бойынша және ІІМ министрінің бұйрығына сәйкес Аленов Бауыржан Төлегенұлы Алматы облысы ПД бастығы болып тағайындалды», — деді министрдің бірінші орынбасары.
Бауыржан Төлегенұлы бұған дейін Қазақстан Республикасы ІІМ жедел қызмет департаментінің бастығы қызметін атқарған.
Алматы облысының әкімі Марат Сұлтанғазиев құқық қорғау және қадағалау органдарымен бірлесіп, Мемлекет басшысы алға қойған міндеттерді іске асыру бойынша бірлескен жұмыс жүргізілетініне сендірді. Және облыс орталығын Талдықорған қаласынан Қонаевқа көшіру бойынша атқарылған жұмыстар туралы айтты.
