Спорт мерекесіне айналған дода ардагер спортшылардың белсенді өмір салтын насихаттап, волейболға деген қызығушылықтың жасқа тәуелді емес екенін тағы бір мәрте дәлелдеді.
Биылғы республикалық турнирге Алматы облысының әртүрлі аудандарынан, сондай-ақ Алматы және Шымкент қалаларынан, Жетісу облысынан келген тоғыз команда қатысты. Жарыс «Достар лига» спорттық жобасы аясында ұйымдастырылып, ардагерлер арасында бұқаралық спортты дамытуға және салауатты өмір салтын насихаттауға бағытталды.
Турнир барысында барлық кездесулер Халықаралық волейбол федерациясының (FIVB) ресми ережелеріне сәйкес өтті. Қатысушылар жоғары техникалық дайындықтарын, тактикалық шеберліктерін және спорттық мінездерін көрсетті. Көптеген матчтардың тағдыры соңғы ұпайларға дейін шешіліп, көрермендерге тартысты ойын сыйлады.
Жарыстың бас төрешісі Гүлзара Ниязованың айтуынша, мұндай турнирлер ардагер спортшылардың белсенді өмір салтын сақтап, денсаулығын нығайтуға зор мүмкіндік береді.
«Достар лига» жобасына қызығушылық жыл сайын артып келеді. Қатысушылар саны көбейіп, жарыстың географиясы кеңеюде. Бұл турнирлер үздіктерді анықтап қана қоймай, өңірлер арасындағы достықты нығайтатын маңызды алаңға айналып отыр. Осындай жарыстар елу жастан кейін де спорттық өмірдің жалғасатынын дәлелдейді», – деді бас төреші.
Мамандардың айтуынша, волейбол жүрек-қан тамырлары жүйесін нығайтып, қозғалыс үйлесімділігін, төзімділікті және психоэмоционалдық саулықты сақтауға оң әсер етеді. Сондықтан мұндай жарыстар егде жастағы азаматтардың денсаулығын нығайтуда маңызды рөл атқарады.
«Алматы облысының спорт ардагерлері ұйымы» қоғамдық бірлестігінің жетекшісі Қайрат Бірімжановтың сөзінше, турнирге қатысушылардың көпшілігі жастайынан спортпен айналысқан және бүгінгі күнге дейін белсенді өмір салтын жалғастырып келеді.
«Біз өте сапалы волейболды тамашаладық. Қатысушылардың жас ерекшелігіне қарамастан, көптеген ойын өте тартысты өтті. Ең бастысы – бұл спортшылар өздерінің балалары мен немерелеріне үлгі болып, спортпен кез келген жаста айналысуға болатынын дәлелдеп жүр», – деді ол.
Жарыс қорытындысында Алматы облысының командалары үздіктер қатарынан көрінді. І орынды Жамбыл ауданының Ұзынағаш ауылынан келген «Жамбыл» командасы жеңіп алды. ІІІ орын Талғар ауданын таныстырған «Талғар» командасына бұйырды. Ал ІІ орынды Жетісу облысының Жаркент қаласынан келген «Аман Саламат» командасы иеленді.
