Мұнда ауыл тұрғындары облыс басшысына көптен бері шешімін таппаған елді мекен сыртындағы жол мәселесін алға тартты. Сонымен бірге, бұл өңірде жаңбыр жауған кезде электр қуаты жиі сөніп қалады.
«Әкіммен кездесуде ауыл тұрғындары Жаңалық елді мекенін газдандыру жұмысы да баяу екенін, бұдан да өзге мәселе мен өтініштер ескерусіз қалып жатқанын айтты», – деп хабарлайды облыс әкімінің баспасөз қызметі.
Әкім сапарында белгілі болған бірінші мәселе – ауылға жаңа мектептің керектігі. Оған қоса мұнда ұялы байланыс пен интернет желісі әлсіз. Ал бұл цифрландыру дәуірінде тіптен кешірілмейтін жағдай. Әкім келеңсіз жайттарды тез арада түзету үшін сала мамандарына нақты тапсырма берді. Облыс әкімі аталған кемшіліктерді жою бойынша кешенді жоспар жасалуы керектігін міндеттеді. Сонымен қатар, Марат Сұлтанғазиев «Айсұлу», «Шығыс», «Нұрай» және «Нұрай-2» шағын аудандарына да барды. Елді мекеннің суармалы су қорының тапшы екенін айтты.
Сондай-ақ жердің сатылуына қатысты тексеріс жүргізген жөн екенін атап өтті. Өйткені, көптеген тұрғындардың қолында бірде-бір құжат жоқ. Олар үй салған жердің барлығы шаруа қожалықтарына тиесілі. Осыған байланысты Алматы облысының прокуроры Берік Адамов кешенді тексеріс жүргізетінін айтты.
