Биыл облыстық медициналық ұйымдардан 29 дәрігер Ресей мен Беларусь елдеріндегі озық клиникалар мен оқу орындарына жіберілген. Іс-сапардың негізгі мақсаты – халықаралық тәжірибе алмасу, заманауи технологияларды меңгеру және медициналық қызмет сапасын арттыру.
Мамандар Санкт-Петербургтегі В.А. Алмазов атындағы Ұлттық медициналық зерттеу орталығында, Санкт-Петербург мемлекеттік педиатриялық медицина университетінде, сондай-ақ Беларусь Республикасындағы «Мать и дитя» республикалық ғылыми-тәжірибелік орталығында білімдерін жетілдірді.
Оқу барысында дәрігерлер балалардағы онкологиялық және гематологиялық ауруларды ерте анықтау, ерте даму мен араласу, жедел кардиология, сондай-ақ хирургиядағы аз инвазивті технологияларды қолдану бағыттары бойынша тәжірибе жинақтады.
Алматы облысы Денсаулық сақтау басқармасының басшысы Ержан Сүлейменовтің айтуынша, мұндай тағылымдамалар өңірдегі медициналық көмектің сапасын арттыруда маңызды рөл атқарады.
«Дәрігерлердің шетелдік тәжірибеден өтуі – тұрғындарға көрсетілетін медициналық көмектің сапасын жақсартудың маңызды тетігі. Алынған білім мен тәжірибе облыстың әрбір ауданында тиімді қолданылып, әсіресе балалар мен созылмалы аурулары бар науқастар үшін үлкен пайдасын тигізеді», – деді ол.
Ведомство мәліметінше, барлық іс-сапарлар облыстық денсаулық сақтау басқармасының қолдауымен ұйымдастырылған. Енді дәрігерлер алған білімдерін тәжірибеде қолданып, өңірде жаңа емдеу әдістерін енгізуге кіріспек.
