Мал ұстау қиындап бара жатыр. Әлеуметтік нысандарда материалдық-техникалық база да шамалы. Жергілікті жерлерде дәрігерлерлер мен мұғалімдер тапшы. Бұл бағытта «Дипломмен ауылға» бағдарламасы өз нәтижесін бермеген. Осы аталған мәселелерді тұрғындар өңірге іссапармен келген Сенат депутаты Жанболат Жөргенбаевқа жеткізді.
Басқосу Қонаев қаласында өтті. Жиынға қоғамдық кеңес мүшелері, мәслихат депутаттары мен ауыл әкімдері қатысып, өз сауалдарын жолдады.
«Іссапарды Жетісу облысынан бастап, бүгін Қонаев қаласында жалғасын тауып жатыр. Алматы облысының да бірнеше аудандарына барып, осындай аудан қала мәслихатының депутаттарымен қоғамдық кеңес мүшелерімен мемлекеттік емес ұйымдардың мүшелерімен ақсақалдар алқасы, елағалармен кездесіп бүгінгі таңдағы парламент депутаттарының үлес қосып, атқарушы биліктегі азаматтармен бірлесе отырып шешетін мәселелерді тыңдап келе жатырмыз», – деді сенатор.
Айта кетейік, Сенат депутатының кездесуі ары қарай жалғасын табады. Осы аптада ол Қарасай, Жамбыл, Кеген, Ұйғыр аудандарына да бармақ.
