Қазақстан Республикасы Төтенше жағдайлар министрлігінің мәліметінше, бойжеткен құздан құлап, басынан жарақат алған. Жарақатының салдарынан ол өздігінен қозғала алмаған.
Құтқарушылар оқиға орнына жеткенге дейін бойжеткенге куәгерлердің бірі алғашқы медициналық көмек көрсеткен.
Туристі эвакуациялау жұмыстарына ТЖМ-нің «Барыс» республикалық жедел-құтқару жасағы мен Алматы қаласы Төтенше жағдайлар департаментінің құтқарушылары жұмылдырылды.
Құтқару операциясын жедел жүргізу мақсатында «Қазавиақұтқару» АҚ-ның тікұшағы тартылды. Әуе көлігі арқылы зардап шеккен турист таулы аймақтан «Медеу» тікұшақ алаңына жеткізілді. Одан әрі ол Төтенше жағдайлар министрлігі Апаттар медицинасы орталығының дәрігерлеріне тапсырылып, мамандандырылған медициналық көмек көрсету үшін емдеу мекемесіне жеткізілді.
Төтенше жағдайлар министрлігі тауға шығуды жоспарлаған азаматтарды қауіпсіздік талаптарын қатаң сақтауға шақырады. Мамандардың айтуынша, күрделі бағыттарға шықпас бұрын ауа райын мұқият бақылап, қажетті құрал-жабдықтарды алып жүру және маршрутыңыз туралы жақындарыңызға немесе құтқару қызметіне алдын ала хабарлау маңызды.
