Дауыс беру процесінің ашық әрі заң талаптарына сай өтуін түрлі деңгейдегі сайлау комиссияларының 4727 мүшесі қамтамасыз етеді.
Қазіргі уақытта сайлау науқанына қатысатын комиссия мүшелері, саяси партиялардың өкілдері мен бұқаралық ақпарат құралдарының қызметкерлеріне арналған оқыту семинарлары өткізіліп жатыр. Семинар барысында қатысушыларға сайлау заңнамасындағы өзгерістер, сайлауалды үгіт жүргізудің тәртібі, сенімді өкілдерді тіркеу рәсімдері және сайлау процесінде заң талаптарын сақтау мәселелері жан-жақты түсіндірілді.
Алматы облыстық аумақтық сайлау комиссиясының төрайымы Мейрамгүл Аитованың айтуынша, мұндай кездесулер сайлау процесіне қатысушылардың құқықтық сауаттылығын арттыруға және заң талаптарын бірізді қолдануға бағытталған.
«Жоспарға сәйкес бұқаралық ақпарат құралдарының өкілдеріне арналған оқыту семинары өтті. Оған облыстық және аудандық басылымдардың журналистері қатысты. Жалпы 30-ға жуық адам жиналды. Семинар қатысушылар үшін пайдалы болды деп сенемін», – деді Мейрамгүл Аитова.
Мамандардың айтуынша, алдағы уақытта да сайлау науқанына қатысатын барлық тараптарға түсіндіру жұмыстары жалғасады. Бұл сайлаудың ашықтығы мен заңдылығын қамтамасыз етуге, сондай-ақ барлық қатысушылардың құқықтары мен міндеттерін дұрыс түсінуіне мүмкіндік береді.
