Өндірістік кешеннің аумағы — 3 мың шаршы метр. “Мерген Холдинг” ЖШС тарапынан салынған инвестиция құны — 1,2 млрд теңге. Кәсіпорын іске қосылғаннан кейін жылына 2 мың тоннадан астам қой жүнін өңдеу жоспарланып отыр.
Өндірісте тазартылып, өңделген қой жүнінен текемет, көрпе және өзге де тұрмыстық бұйымдар шығарылмақ. Бұл өз кезегінде отандық өнім көлемін арттырып, шикізатты тиімді пайдалануға мүмкіндік береді.
“Мерген Холдинг” ЖШС-нің бас директоры Сабит Алиевтің айтуынша, кәсіпорынға қажетті жұмыс күші негізінен Райымбек, Кеген және Ұйғыр аудандарынан тартылады.
«Алғашқы кезеңде автоматтандырылған құрылғылармен жұмыс істеуге 50-ге жуық адам қабылданады. Алдағы уақытта, өндіріс көлемі ұлғайған сайын қызметкерлер саны да артып, аталған аудандар тұрғындарының 70-80 пайызы жұмыспен қамтылады», — деп атап өтті Сабит Алиев.
Аталған өндіріс іске қосылса бұл жергілікті кәсіпкерліктің дамуына ықпал етіп, жеңіл өнеркәсіп саласының бәсекеге қабілеттілігін күшейтуге мүмкіндік береді. Сонымен қатар, жаңа жұмыс орындарының ашылуы ауылдық аумақтардың әлеуметтік-экономикалық жағдайын жақсартуға оң әсерін тигізеді.
