Ол дауыл кезінде сарбаздарға шатырлы қалашықтан шығуға көмектесіп жүріп, шатырдың металл қаңқасына басын жаралап алған.
«9 тамызда сағат 20:55 шамасында қатты дауыл басталып, жел соғып, тігілген шатырлар қирай бастады. Қатардағы жауынгер Н. Шахимов өз әріптестеріне қауіпсіз жерге эвакуациялауға көмектесіп жүрген. Сол кезде шатырдың металл жақтауына басын соғып, жарақат алды. Бірден медициналық көмек көрсетіліп, жауынгер Қонаев қаласындағы медициналық мекемеге жеткізілді. Әскери қызметші ауруханада қайтыс болды. Өзінің жанқиярлық іс-әрекеттерімен қатардағы жауынгер Н. Шахимов жолдастарын құтқарып қалды. Алайда өзі басынан ауыр жарақат алды», – делінген Ұлттық ұланның хабарламасында.
Шахимов 2003 жылы туған. Әскерге 2022 жылдың көктемінде Ақмола облысы Көкшетау қаласының қорғаныс істері жөніндегі департаменті арқылы шақырылған. Аталған факті бойынша себептері мен мән-жайлары анықталып жатыр, қызметтік тергеу жүргізілуде.
Айта кетейік, Алматыда жедел мақсаттағы бірінші батальонның жеке құрамы 8-13 тамыз аралығында далалық жаттығуда болған.
