Чемпионатқа 16 жастан асқан, тірек-қимыл аппараты бұзылған спортшылар қатысуда. Жарысқа Астана мен Алматы қалаларының, сондай-ақ Батыс Қазақстан, Жамбыл, Алматы және Жетісу облыстарының командалары келген.
Чемпионаттың ашылу салтанатында қатысушыларға сәттілік пен жеңіс тілектері айтылып, елімізде әйелдер арасындағы параволейболдың қарқынды дамып келе жатқаны атап өтілді.
Алматы облысының дене шынықтыру және спорт басқармасы бөлімінің басшысы Дулатбек Құсбековтің айтуынша, мұндай жарыстар спортшылардың тәжірибесін арттырып қана қоймай, жаңа таланттарды анықтауға мүмкіндік береді.
«Бүгінде әйелдер арасындағы отырып ойнайтын волейболдың дамып, барған сайын танымал бағытқа айналып келе жатқанын көріп отырмыз. Біз үшін жарыстарды өткізумен ғана шектелмей, спортшылардың шеберлігін шыңдап, жарыс тәжірибесін жинақтауына және алдағы нақты мақсаттарын айқындауына жағдай жасау маңызды. Мұндай чемпионаттар адамдарды біріктіріп, жаңа есімдерді танытып, болашақтағы халықаралық жеңістердің негізін қалайды», – деді Дулатбек Құсбеков.
Әйелдер арасындағы параволейболды дамытуда Алматы облысының командасы жоғары нәтиже көрсетіп келеді. Бір жыл бұрын өңір спортшылары Қазақстан кубогында үшінші орын иеленсе, 2025 жылдың желтоқсанында ел чемпионатында жеңімпаз атанды.
Қазіргі таңда Қазақстанның әйелдер арасындағы отырып ойнайтын волейболдан ұлттық құрамасы да Алматы облысының командасы негізінде жасақталған. Биыл жергілікті спортшылар чемпиондық атағын қорғауға жаңарған құраммен келіп отыр.
Алматы облысы командасының және Қазақстан әйелдер құрамасының аға жаттықтырушысы Нусрет Ақылбаев қазіргі чемпионатты тек жүлде үшін талас емес, халықаралық жарыстарға қатысатын спортшыларды іріктеудің маңызды кезеңі деп бағалады.
«Қазақстан кубогындағы үшінші орыннан кейін команда үлкен жолдан өтті. Өткен жылдың желтоқсанында ел чемпионатында жеңіске жету біз үшін маңызды нәтиже болды. Осы уақыт ішінде спортшылардың шеберлігі айтарлықтай өсті. Бүгінде команда ұйымшыл, бір-бірін жақсы түсінетін және өз күшіне сенімді ұжымға айналды. Қазіргі жарысты болашақта Қазақстанды әлемдік деңгейде лайықты таныстыратын спортшыларды іріктеу мен дайындаудың маңызды кезеңі ретінде қарастырамыз», – деді Нусрет Ақылбаев.
Қазақстанда отырып ойнайтын волейболдың халықаралық деңгейдегі жетістіктері де бұл спорт түрінің дамуына серпін беріп отыр. Ерлер ұлттық құрамасы бірнеше жылдан бері халықаралық жарыстарда ел намысын қорғап келеді. Биыл қазақстандық спортшылар әлем чемпионатында қола жүлдеге ие болып, тарихи нәтижеге қол жеткізді.
Алматы облысының сапында Айгүл Ордабаева, Дамира Сұлтанбекова, Күміс Жұмағалиева және Жазира Мұқашева сынды тәжірибелі спортшылар өнер көрсетіп жүр. Олар үшін волейбол тек жарыс пен нәтиже ғана емес, өзіне деген сенімді арттырып, жаңа мақсаттарға жетелейтін өмірдің маңызды бөлігіне айналған.
Қазақстан Республикасының спорт шеберлігіне кандидат Дамира Сұлтанбекованың айтуынша, алаңға шыққанда спортшы үшін команда, қарсылас және ортақ мақсат қана маңызды.
«Алаңға шыққан кезде бір кездері қандай қиындықтар болғанын ойламайсың. Бұл жерде сен жай ғана спортшысың: команда, қарсылас және мақсат бар. Волейбол маған өз күшіме қайта сенуге көмектесті. Көптеген әйелдердің отбасы, балалары, жұмысы бар. Соған қарамастан жаттығуға уақыт табуға тырысамыз. Үлкен жеңістерге қол жеткізген сайын одан әрі жаттығып, командамен бірге жаңа нәтижелерге жетуге деген ынта арта түседі», – деді Дамира Сұлтанбекова.
Чемпионаттағы негізгі бәсекелестер қатарында Алматы облысымен бірге Астана қаласы мен Жетісу облысының командалары аталып отыр.
Ел чемпионатының жеңімпаздары мен жүлдегерлері 23 тамызда анықталады.
