Төтенше жағдайлар министрлігінің мәліметінше, 17 маусым күні 112 пультіне Талғар ауданына қарасты Кендала ауылындағы кафеге жапсарлас салынған кәуапхананың өртенгені туралы хабарлама түскен.
Оқиға орнына ТЖМ бөлімшелері жедел жіберіліп, өрт сөндіру жұмыстары дереу басталған.
Ведомство құтқарушылардың жедел әрі үйлесімді әрекетінің арқасында жалынның негізгі кафе ғимаратына таралуына жол берілмеген. Сонымен қатар, өрт ошағынан бес газ баллоны қауіпсіз жерге шығарылып, ықтимал жарылыстың алдын алу мүмкін болған.
«Өртті сөндіру барысында қауіпті аймақтан бес газ баллоны шығарылып, олардың жарылуына жол берілген жоқ. Құтқарушылар 22 минут ішінде 50 шаршы метр аумақтағы өртті толықтай сөндірді», – деп хабарлады ТЖМ баспасөз қызметі.
Өрт салдарынан зардап шеккендер жоқ.
Қазіргі уақытта мамандар өрттің шығу себептерін анықтап жатыр. Тиісті сараптамалар мен тексеру жұмыстары жүргізілуде.
ТЖМ өкілдері қоғамдық тамақтану орындары мен кәсіпкерлік нысандарының иелерін өрт қауіпсіздігі талаптарын қатаң сақтауға шақырды. Әсіресе газ жабдықтарын пайдалану кезінде қауіпсіздік ережелерін сақтау маңызды екені ескертілді.
