Алматы облысы Полиция департаментінің қызметкерлері облыстық Ұлттық қауіпсіздік комитеті департаментімен бірлесіп, прокуратураның үйлестіруімен Қарасай ауданында жұмыс істеген ірі астыртын есірткі зертханасының қызметін тоқтатты.
Жедел-іздестіру шаралары барысында облыстық ПД Есірткі қылмысына қарсы іс-қимыл басқармасының қызметкерлері синтетикалық есірткі өндіруге арналған құпия зертхананың мекенжайын анықтап, оған қатысы бар күдіктінің жеке басын белгіледі.
Заңсыз есірткі өндірісін ұйымдастырды деген күдікпен 32 жастағы азамат ұсталып, уақытша ұстау изоляторына қамалды.
Тінту кезінде құқық қорғау органдары түрлі көлемдегі канистрлерді, химиялық заттардың қалдықтары бар ыдыстарды, респиратор сүзгілерін, вакуумдау құрылғыларын, электронды таразыларды, химиялық ерітінділер құйылған пластик ыдыстарды, есірткі құрамдастарын араластыруға арналған жабдықтарды және синтетикалық есірткі өндіруге пайдаланылған басқа да құралдарды тәркіледі. Сонымен қатар дайын өнім де анықталды.
Сараптама қорытындысы бойынша тәркіленген зат жалпы салмағы 217,59 грамм болатын «мефедрон» психотроптық затының аналогы болып шықты.
Полиция мәліметінше, арнайы операцияның нәтижесінде заңсыз айналымға түсуі мүмкін 3000-нан астам бір реттік дозаға тең есірткі тәркіленген.
Қазіргі уақытта қылмыстық іс бойынша қажетті тергеу амалдары жүргізілуде. Құқық қорғау органдары есірткінің тарату арналары мен оны өндіруді ұйымдастыруға қатысы болуы мүмкін өзге тұлғаларды анықтау жұмыстарын жалғастырып жатыр.
