Облыстық прокуратура мәліметінше, есепті кезеңде 28 инвестордың 30 өзекті мәселесі шешімін тапқан. Бұл жұмыстар инвесторларға әкімшілік кедергілерді азайтып, инвестициялық жобаларды уақытылы жүзеге асыруға мүмкіндік берген.
Прокурорлық сүйемелдеу нәтижесінде бақылаушы және қадағалаушы органдардың заңсыз жүргізген алты тексерісі мен үш әкімшілік айыппұлының күші жойылды. Сонымен қатар инвесторларға төрт жер учаскесі беріліп, электр желілеріне қосылуға қажетті екі техникалық шарт рәсімделген.
Инвесторлардың заңды құқықтарын бұзғаны үшін жауапты лауазымды тұлғалар да жауапкершілікке тартылды. Нәтижесінде сегіз қызметкер тәртіптік, ал он лауазымды тұлға әкімшілік жауапкершілікке тартылған.
Қадағалау органының қабылдаған шараларының нәтижесінде Ұлттық цифрлық инвестициялық платформаға 100-ге жуық инвестор енгізілді. Бұл өз кезегінде инвесторларды қорғаудың қосымша тетіктерін, соның ішінде «прокурорлық сүзгі» механизмін тиімді пайдалануға мүмкіндік береді.
Бұдан бөлек, прокуратура есепті кезеңде инвесторларға қатысты үш тексерісті, он әкімшілік хаттаманы және шектеу сипатындағы он бір шараны келісуден бас тартқан. Сондай-ақ мемлекеттік органдар прокурордың келісімінсіз сотқа жолдаған екі талап арызын кері қайтарып алған.
