Фестиваль аясында 30-дан астам әуе шары бір мезетте көкке көтеріліп, қонақтарға аэростатпен ұшу мүмкіндігі ұсынылады. Ұйымдастырушылардың мәліметінше, шара өңірдегі ең ауқымды отбасылық демалыс алаңдарының біріне айналмақ.
Бағдарлама аясында ұзындығы 15 метрге дейін жететін алып әуе батпырауықтарының шоуы, фудкорттар, кемпинг аймағы және балалар мен ересектерге арналған түрлі ойын-сауық шаралары ұйымдастырылады.
Фестивальдің басты ерекшелігі – ондаған әуе шарының бір мезетте аспанға көтерілуі. Қонақтар аэростатпен ұшып, Іле Алатауының бөктері мен Қаскелеңнің көркем табиғатын құс көзінен тамашалай алады.
Кешкі концерттік бағдарлама да көрермендерге ерекше әсер сыйламақ. 6 маусым күні фестиваль сахнасында DJ King Macarella өнер көрсетсе, 7 маусымда аңызға айналған «Дос-Мұқасан» ансамблі мен қазақстандық әнші Мирас Жүгінісов ән шырқайды.
Балаларға арналған арнайы аймақта шеберлік сабақтары, батуттар және анимациялық бағдарламалар өтеді.
Ұйымдастырушылар романтикалық ұсыныс жасағысы келетін жұптар үшін де ерекше мүмкіндік қарастырған. Қалаған қонақтар әуе шарымен ұшу кезінде сүйіктісіне үйленуге ұсыныс жасай алады.
Фестивальге кіру билеттерінің құны 5 мың теңгеден басталады. 5 жасқа дейінгі балаларға кіру тегін. Қонақтарға ыңғайлы болу үшін Алматы қаласынан арнайы трансфер ұйымдастырылып, автотұрақ пен шатырлы лагерь қызмет көрсетеді.
Айта кетейік, фестивальдің басты мақсаты – өңірдің туристік әлеуетін танытып, тұрғындар мен қонақтарға ерекше демалыс сыйлау.
