Бас прокуратур мәліметінше, күдікті Алматы облысында аса ірі көлемде мефедрон өндіруді ұйымдастырған. Кейін дайын психотроптық заттар Алматы облысы мен Алматы қаласының аумағында жасырын жолмен таратылған.
Тергеу барысында қылмыстық топтан 10 келіге жуық мефедрон тәркіленген.
Ведомство қылмыстық топ заңсыз жолмен тапқан 1,8 миллиард теңгеден астам қаражатты түрлі қаржылық операциялар, соның ішінде криптоалмастырғыштар арқылы заңдастырғанын айтады. Сонымен қатар олар 600 миллион теңгеден астам сомаға жылжымайтын мүлік, бизнес нысандары мен көлік құралдарын сатып алған. Аталған активтердің барлығына мемлекет пайдасына тәркілеу мақсатында тыйым салынды.
Қазіргі уақытта қылмыстық топтың бірқатар мүшелеріне қатысты іс сотта қаралып жатыр. Ал күдіктілердің кейбірі құқық қорғау органдарынан бой тасалап, халықаралық іздеуге жарияланған болатын.
Олардың бірі биыл қаңтар айында Грузия аумағында ұсталып, Бас прокуратураның сұрауы бойынша Қазақстанға экстрадицияланды.
Қазір күдікті тергеу изоляторына қамалды. Егер кінәсі дәлелденсе, оның мүлкі тәркіленіп, 20 жылға дейін бас бостандығынан айырылуы мүмкін.
