Олардың ішінде 3 мектептің күрделі жөндеу жұмыстары аяқталды. Ал 11 мектептің жөндеу жұмыстары жүргізіліп жатыр. 3 мектеп бойынша конкурс қорытындысы шығып, 2 тамызда келісім-шарт жасалып, жұмыстары басталды.
Талғар ауданы Дәулет ауылындағы №11 орта мектебі ғимаратының едені мен ішкі керегелері 2020 жылдың қаңтар айында жер асты сулары деңгейінің көтерілу салдарынан отыра бастады. Бұл жағдай жобалаушылардың геологиялық барлау жұмыстарын дұрыс орындамағанынан орын алған.
Білім басқармасының мәліметінше, жобалаушы мекеме ғимаратты жер астында батпақты негізі мен шөгінді топырақтары бар аумаққа орналастырған. Бүгінгі таңда 1-қабаттың ішкі бөлмелері мен асхананың ақаулары түзетілді.
«KaзНИИСА-ның 08.11.2021 жылғы №317 қорытындысына сәйкес «3- блоктың салынған бөлімдері мен қабырға конструкцияларының сәйкестігі туралы» 3-блоктың (асхана) жобалау шешімдерінің сәйкестігі, сонымен қатар Алматы облысы Талғар ауданының Дәулет ауылының 300 орындық құрылыс нысанының «ПСК Градцентр» ЖШС инженерлік-геологиялық жағдайлар туралы есебі алынды», — деп хабарлады басқармадан.
Кәріз жүйесі деңгейінің айналасында судың дренаждық жүйесін жасау үшін 62 млн теңге қаражат бөлінді. Қазір конкурс өткізіліп жатыр.
«Нұр Құрылыс-80» ЖШС тарабынан «КазНИИСА» АҚ-мен келісімшарт негізінде 7 млн теңгеге «Қойылған конструкциялардың және 1,2-ші блоктардың жобалық шешімдерге сәйкестігі» туралы қорытындысы алынды.
Оған сәйкес мектеп ғимараты қалыпты жағдайда, яғни бала өміріне қауіп жоқ. Білім бөлімі дренаж жұмыстарын жүргізуге 58 млн теңгеге қайтадан конкурс өткізді.
Сонымен қатар мектеп ғимаратына ағымдағы жөндеу жұмыстарын жүргізуге 95,6 млн теңгеге ашық конкурс берілген.
«Ағымдағы жөндеу жұмыстары оқу процесіне кедергі келтірмейді, себебі жөндеу жұмыстары 1 блоктың 1 қабатында өткізіледі, онда 3 оқу кабинеті ғана бар. Қалған 2-3 қабатта оқу кабинеттері жеткілікті», — деді басқарма басшысының орынбасары Гүлсара Исағұлова.
