Облыстық маңызы бар жолдарда да бірқатар ірі жоба жүзеге асырылуда. 2026 жылы жалпы ұзындығы 50 шақырым болатын үш жол учаскесіндегі күрделі жөндеу аяқталмақ. Бұл мақсатқа 16,6 млрд теңге бөлінген.
Атап айтқанда, «Есік – Саймасай (Александровка)» автожолының 11,8 шақырымында асфальтбетон жабыны толық төселіп, жұмыстар 95 пайызға орындалды. «Алмалыбақ (КИЗ) – Жетісу» жолының 18,1 шақырымындағы жөндеу 70 пайызға, ал «Алматы-1 – Шамалған станциясы – Ұзынағаш» жолының 19,5 шақырымындағы жұмыстар 65 пайызға жетті.
Қарасай ауданында Қаскелең өзені арқылы өтетін көпір күрделі жөндеуден өтіп, пайдалануға берілді. Жобаның жалпы құны 551,5 млн теңгені құрады.
Еңбекшіқазақ ауданында «Приканальная БАК» автомобиль жолының 54,8-шақырымындағы Түрген өзені арқылы өтетін көпір жаңғыртылып жатыр. Су шайып кеткен өткелді қалпына келтіруге 674,5 млн теңге бөлінген. Құрылыс-монтаж жұмыстарын жыл соңына дейін аяқтау жоспарланған.
Сонымен қатар биыл жалпы ұзындығы 23,4 шақырымды құрайтын алты жол учаскесінде орташа жөндеу жүргізілуде. Оның үшеуі 2027 жылға өтпелі жоба ретінде қарастырылған.
Жолдарды күтіп ұстау және қозғалыс қауіпсіздігін қамтамасыз ету жұмыстарына алты мердігер ұйым, 151 арнайы техника және 164 жол жұмысшысы жұмылдырылған.
Бүгінде облыстық маңызы бар жолдарда 800 шақырым жол таңбасы жаңартылып, 65 мың шаршы метр жолға ағымдағы жөндеу жүргізілді. Бұдан бөлек, 480 жол белгісі, 2,5 шақырым темір қоршау және 42 автобус аялдамасы орнатылды.
Аудандық көше-жол желісін дамыту аясында биыл 142 жоба қолға алынған. Олар жалпы ұзындығы 666 шақырым жолды қамтиды. Оның 510,6 шақырымын 2026 жылы аяқтау жоспарланса, қалған 155,4 шақырымы 2027 жылға өтпелі жоба ретінде жүзеге асырылады.
Қазіргі таңда биылға жоспарланған жол жөндеу жұмыстарының 63 пайызы орындалып, 322,4 шақырым жол жөнделді.
Жұмыстар Қарасай ауданында 78 пайызға, Іле ауданында 77 пайызға, Жамбыл ауданында 75 пайызға, Еңбекшіқазақ ауданында 70 пайызға орындалған.
Сонымен бірге Іле ауданындағы «Боралдай – Шіліккемер» автожолының екі учаскесінде ауыр жүк көліктерінің қозғалысын бақылауға арналған автоматтандырылған өлшеу станциялары орнатылып жатыр. Жоба 70 пайызға орындалған, оны 2026 жылғы желтоқсанда аяқтау жоспарланып отыр.
Алматы облысында жолдардың сапасын жақсарту және тұрғындар үшін қауіпсіз әрі қолайлы көлік қатынасын қалыптастыру бағытындағы жұмыстар кезең-кезеңімен жалғасады.
