Кездесуге Алатау қаласы полиция басқармасы басшысының орынбасары Айдос Молдағалиев, ардагерлер ұйымының мүшесі Асан Құлтанов, Қоғамдық келісім және дамыту орталығының маманы Ғабит Сембиев және алғашқы медициналық көмек көрсету орталығының қызметкері Айдана Баймұхан қатысты.
Жиында мамандар алкогольді ішімдіктерді тұтынудың адам денсаулығына, отбасы берекесіне және қоғамдық қауіпсіздікке тигізетін кері әсеріне тоқталды. Сондай-ақ тұрғындар арасында салауатты өмір салтын қалыптастыру мен құқықбұзушылықтардың алдын алудың маңыздылығы айтылды.
Алатау қаласы полиция басқармасы басшысының орынбасары Айдос Молдағалиев қоғамдық тәртіпті сақтау және құқықбұзушылықтардың алдын алу бағытындағы жұмыстар туралы баяндады. Ол қауіпсіз орта қалыптастыруда тұрғындардың белсенділігі мен жауапкершілігі маңызды екенін атап өтті.
Ал медицина маманы Айдана Баймұхан алкогольдің адам ағзасына зиянын түсіндіріп, денсаулықты сақтаудың және зиянды әдеттерден бас тартудың маңыздылығына назар аударды.
Қоғамдық келісім және дамыту орталығының өкілі Ғабит Сембиев тұрғындар арасындағы өзара түсіністік пен қоғамдық келісімді нығайту, жастарға дұрыс тәрбие беру және салауатты өмір салтын насихаттау мәселелерін көтерді.
Кездесу барысында тұрғындар өздерін толғандырған мәселелер бойынша пікір алмасып, алдағы уақытта бірлескен жұмысты жалғастыру жөнінде ұсыныстарын білдірді.
Жиын қорытындысында тараптар ынтымақтастықты нығайту және ортақ бастамаларды жүзеге асыру мақсатында меморандумға қол қойды.
Ұйымдастырушылардың айтуынша, бастаманың негізгі мақсаты – Құйған шағынауданында алкогольсіз өмір салтын насихаттау, тұрғындардың денсаулығын қорғау, құқықбұзушылықтардың алдын алу және қауіпсіз қоғамдық орта қалыптастыру.
Бұл бағыттағы жұмыстарды жүйелі түрде жалғастыру жоспарланып отыр.





