Жобаны түркиялық инвестор жүзеге асыруға ниетті. Жылыжайда қызанақ пен банан өсіру көзделген.
Жобаны іске асыру мәселесі Алматы облысының Өңірлік даму орталығында өткен жұмыс кездесуінде талқыланды. Кездесуге түркиялық компанияның өкілдері қатысып, тараптар болашақ кешеннің негізгі параметрлері мен инвестициялық жобаны жүзеге асыру шарттарын қарастырды.
Кездесу барысында жылыжай салынатын жер учаскесін таңдау, қажетті инженерлік инфрақұрылымға қосылу және инвесторға қолжетімді мемлекеттік қолдау шаралары сөз болды.
Ендігі кезеңде инвестордың талаптары мен болашақ жылыжай кешенінің техникалық параметрлеріне сәйкес келетін жер учаскелерін іріктеу жұмыстары басталады.
Алматы облысының Өңірлік даму орталығы инвестициялық жобаны сүйемелдеу және оны іске асыруға қажетті мәселелерді шешу бойынша жұмысты жалғастырады.
Жоба жүзеге асқан жағдайда Алматы облысында қызанақпен қатар, жергілікті климат үшін дәстүрлі емес дақыл саналатын банан да жылыжай жағдайында өсірілмек.
