Осыған байланысты дәрігерлер мен төтенше жағдайлар қызметі тұрғындарды денсаулықтарына ерекше мән беріп, күннің ең ыстық уақытында сақтық шараларын қатаң сақтауға шақырып отыр.
Мамандардың айтуынша, сағат 11:00 мен 17:00 аралығында тікелей күн сәулесінің астында ұзақ уақыт болмаған жөн. Сондай-ақ тұрғындарға жеткілікті мөлшерде су ішу, жеңіл әрі ашық түсті киім кию, міндетті түрде бас киім тағу, өрт қауіпсіздігі талаптарын сақтау және ауа райы болжамдары мен ресми ескертулерді тұрақты бақылап отыру ұсынылады.
Дәрігерлер әсіресе егде жастағы адамдарға, балаларға, жүкті әйелдерге, сондай-ақ жүрек-қан тамырлары және созылмалы аурулары бар азаматтарға ерекше сақ болуды ескертеді. Егер адамда қатты әлсіздік, бас айналу, бас ауруы, тыныс алудың қиындауы немесе есінен тану белгілері байқалса, дереу медициналық көмекке жүгініп немесе 103 нөмірі арқылы жедел жәрдем шақыру қажет.
Алматы облысы Денсаулық сақтау басқармасының мәліметіне сәйкес, 13 маусымнан бері, яғни аптап ыстық басталған уақыттан бастап, өңірдегі медициналық ұйымдарға 1 488 адам жүгінген. Оның ішінде 367 тұрғын ауруханаға жатқызылса, 471 адамға мобильді медициналық бригадалар үй жағдайында көмек көрсеткен. Ал 650 тұрғын емханаларда ем қабылдаған.
Медициналық көмекке жүгінудің негізгі себептері қатарында бас айналу, бас ауруы, артериялық қан қысымының жоғарылауы, ентігу, мұрыннан қан кету, жалпы әлсіздік және жоғары ауа температурасының ағзаға кері әсері тіркелген.
Медицина мамандары қарапайым қауіпсіздік шараларын сақтау күн өтудің және ыстықтан болатын асқынулардың алдын алуға мүмкіндік беретінін айтады. Сондықтан тұрғындарға денсаулық жағдайына мұқият болып, әсіресе күннің ең ыстық мезгілінде ашық аспан астында ұзақ уақыт болмау ұсынылады.
