Облыс әкімінің орынбасары кәсіпорында Туя күніне орай ұйымдастырылған мерекелік шараға қатысып, өсімдіктерді өсіру мен күтіп-баптауда қолданылатын технологияларды көрді.
GREEN SERVICE питомнигінде қылқан жапырақты және жапырақты ағаштар, бұталар мен көпжылдық гүлдер өсіріледі. Кәсіпорын аумағында заманауи жылыжай кешені, контейнерлік өсімдіктерге арналған арнайы аймақ, көлік-логистикалық және сауда-көрме орталығы жұмыс істейді.
Питомник өкілдерінің айтуынша, мұндағы өсімдіктер Қазақстанның климаттық жағдайына бейімделген және жерсіну көрсеткіші жоғары. Қазір кәсіпорын қылқан жапырақты ағаштарды өсіруге басымдық беріп отыр.
GREEN SERVICE ЖШС директоры Екатерина Пушилинаның айтуынша, қылқан жапырақты өсімдіктердің басты артықшылықтарының бірі – жылдың төрт мезгілінде де жасыл қалпын сақтауы.
«Таза қылқан жапырақты ағаштардан да бақ жасауға болады. Олар жылдың төрт мезгілінде жасыл болып қана қоймай, адамға пайдасы да зор. Жапырақтарын сыпырып, тазалап жатудың қажеті жоқ, оттегін көп бөледі. Бүгінде 12 гектар аумақта 60 мың түп қылқан жапырақты ағаш өсіріп отырмыз», – деді ол.
Кәсіпорын басшысының мәліметінше, жыл сайын питомниктен шамамен 15 мың түп шырша мен бозарша көшеті сатылады. Олардың басым бөлігі Алматы қаласы мен Алматы облысының елді мекендерін көгалдандыруға жіберіледі. Сонымен қатар питомник өнімдеріне көршілес елдерден де сұраныс бар.
Туя күні аясында питомник мамандары қылқан жапырақты ағаштарды дұрыс отырғызу, өсіру және күтіп-баптау ерекшеліктері туралы айтып, тәжірибелерімен бөлісті. Өзге аудандардан келген орман шаруашылығы мамандары питомник аумағына көшеттер отырғызды.
Алматы облысы әкімінің орынбасары Бақытнұр Бақытұлы мұндай тәжірибе алмасу «Таза Қазақстан» экологиялық бағдарламасы аясындағы міндеттерді жүзеге асыруда маңызды екенін атап өтті.
«Бүгін Туя күніне арналған шараға орай GREEN SERVICE ЖШС базасына келіп, мұндағы нақты тәжірибемен таныстық. Алдымызда «Таза Қазақстан» экологиялық бағдарламасы аясында облысымыздың орман алқаптарына көптеп ағаш егу міндеті тұр. Сондықтан өзара тәжірибе бөлісіп, жаңа технологияларды бірге меңгеріп, сенімді серіктеске айналамыз деген ойдамын», – деді Бақытнұр Бақытұлы.
Өңірде көгалдандыру көлемін арттыру үшін көшетті көптеп отырғызумен қатар, оның жергілікті климатқа бейімделуі мен кейінгі күтіміне де басымдық беріліп отыр. GREEN SERVICE питомнигіндегі тәжірибені осы бағыттағы жұмыстарда пайдалану көзделеді.
