Кездесу барысында тараптар өңіраралық ынтымақтастықты нығайту, өзара сауда көлемін арттыру, инвестиция тарту және бірлескен өндіріс орындарын ашу мәселелерін қарастырды. Шыңғыс Әрінов Қазақстан мен Беларусь арасында дипломатиялық қатынас орнаған 34 жыл ішінде екі елдің стратегиялық әріптестігі жаңа деңгейге көтерілгенін атап өтті.
Облыс әкімінің айтуынша, Алматы облысы жалпы өңірлік өнім көлемі бойынша еліміздің жетекші бес өңірінің қатарына кіреді. Аймақтың ауыл шаруашылығы, өнеркәсіп және инвестициялық әлеуеті жоғары.
Сондай-ақ өңір басшысы Беларусь инвесторларын Алатау қаласын дамытуға қатысуға шақырды. Жалпы аумағы 89 мың гектарды құрайтын жаңа қалада инвесторларға салықтық жеңілдіктер мен басқа да қолдау шаралары қарастырылған.
«Беларусь – Алматы облысының маңызды сауда серіктестерінің бірі. Еуразиялық экономикалық одақ елдері арасында тауар айналымы көлемі бойынша Ресей мен Қырғызстаннан кейін үшінші орында тұр. Өзара сауданы кеңейту және Беларусь өндірістерін Алматы облысында жергіліктендіру бағытында әлеуетті мүмкіндіктер бар деп санаймыз», – деді Шыңғыс Әрінов.
Бүгінде Алматы облысында Беларусь капиталының қатысуымен 11 кәсіпорын және бірлескен меншік нысанындағы 5 кәсіпорын жұмыс істейді. Өңір басшысы Беларусь компанияларына қажетті өндірістік алаңдар мен инфрақұрылым ұсынуға, сондай-ақ инвестициялық жобаларды сүйемелдеуге дайын екенін жеткізді.
Өз кезегінде Беларусь Республикасының Қазақстандағы елшісі Алексей Богданов жылы қабылдауға алғыс білдіріп, сауда, ауыл шаруашылығы және басқа да салалар бойынша екіжақты ынтымақтастықты дамытуға дайын екенін айтты.
Айта кетейік, Алматы облысында беларусь этносының 1 188 өкілі тұрады. Талғар ауданында «Беларусь мәдени орталығы» қоғамдық бірлестігінің облыстық филиалы жұмыс істейді.
