F-7 BGI үлгісіндегі әскери оқу ұшағы Дакканың Уттара ауданында орналасқан Майлстоун мектебі мен колледжінің аумағына құлаған. Куәгерлердің айтуынша, апат кезінде оқу орнында балалар болған.
Бангладеш армиясы ұшақтың әскери әуе күштеріне тиесілі екенін растады. Өрт сөндіру және азаматтық қорғаныс қызметінің өкілі Шахджахан Шикдердің мәліметінше, 19 адам қаза тапқан. Алайда денсаулық сақтау министрлігінің кеңесшісі Сайедур Рахман 16 адамның мерт болғанын, ал 100-150 адамның түрлі жарақат алғанын хабарлады.
Ұшақты басқарған авиация лейтенанты Товкир Ислам Сагар ауыр жараланып, Біріккен әскери госпитальдің жансақтау бөліміне жеткізілді. Оның жағдайы – өте ауыр.
Қайғылы оқиғаның нақты себептері әзірге ресми түрде жарияланған жоқ. Ел билігі тергеу жұмыстарын бастап кетті. Бангладеште бұл апат қоғамның, әсіресе ата-аналар мен білім саласының өкілдері арасында үлкен алаңдаушылық туғызды.
Қайғылы оқиғаға байланысты ел бойынша 22 шілде күні барлық мемлекеттік мекемелерде тулар төмен түсіріліп, аза тұту рәсімдері өтуде.
