Синоптиктердің мәліметінше, Қазақстан аумағына кезекті циклон жақындап келеді. Бұған дейін күн жылып, көктем лебі сезіле бастағанымен, суық ауа массалары елдің біраз өңіріне жаңбыр, найзағай, ал солтүстікке – қар мен бұршақ алып келмек.
«Қазақстанда күн жылына бастаған еді, бірақ жаңа циклонның келуімен ауа райы қайта құбылады. Суық фронтпен бірге жаңбыр мен найзағай күтіледі. Солтүстік өңірлерде түнде қар жауып, кейбір аймақтарда бұршақ түсуі мүмкін», – делінген ресми мәлімдемеде.
Синоптиктердің болжамынша, 5 сәуір күні Қазақстанның шығысы мен оңтүстік-шығысындағы таулы өңірлерде ауа массалары соқтығысып, синоптикалық процестердің күшеюіне алып келеді. Бұл жағдай қатты жауын-шашынның түсуіне себеп болмақ.
Көктемнің құбылмалы ауа райына байланысты мамандар тұрғындарға абай болуды және ауа райының күнделікті болжамдарын қадағалап жүруді ұсынады.
