Талғар ауданына қарасты Панфилов ауылының тұрғындары Гуля Тахметова мен Айжан Сосин өздері тұрып жатқан 4 қабатты тұрғын үйге газбен жылыту жүйесін орнатып беруді сұрады. Тұрғындар өз қалтасынан қаражат шығарып, ақылы түрде жылыту жүйесін тарттырмақшы болған. Алайда кейбір заң шеңберінде кедергіге тап болған. Базынасын айта келгендер бұл мәселені әкім өз назарына алуын сұрады.
Сонымен қатар, тұрғын үйдің ауласы мен жолы да жөндеуді аса қажет ететінін де қоса кетті. Әкімнің қабылдауында болған «КазМис» саяжайының тұрғыны Әбілтай Айтқазин жергілікті халықтың мәселесін айта келген. Аталған ауылдың батыс бөлігіндегі қалаға шығатын жалғыз жолды «БАКАД» түрік компаниясы жауып тастаған. Салдарынан оқушылар мектепке бара алмай, халық қатынаудан қалған.
Іле ауданына қарасты Түймебай ауылының тұрғыны Жеңісгүл Дәулетова қолөнер орталығының құрылысына қолдау көрсетуді өтінді. Еңбекшіқазақ ауданына қарасты Баубақша қыпшақ саябағының тұрғыны Өрікгүл Илданова үйін салып болған соң ғана алаяқтарға алданғанын бір-ақ білген. 7,5 соттық жерді сатып алып, соңында ол жер 2022 жылдың қаңтар айынан бастап егістік жер деп танылғанын біледі. Жиын барысында облыс әкімі Марат Сұлтанғазиев басқарма басшылары мен аудан әкімдері мен орынбасарларына арнайы тапсырма беріп, кейбір мәселелерді аудан шеңберінде шешуді жүктеді.
