Іс-шараға Қазақстан Республикасының Ғылым және жоғары білім министрі Саясат Нұрбек, Корея Республикасының Қазақстандағы Төтенше және Өкілетті Елшісі, KAIST университетінің басшылығы мен сарапшылары, сондай-ақ Alatau City басқарушы компаниясының өкілдері мен инвесторлар қатысты.
Кездесу барысында KAIST мамандары QAIST жобасының әзірленген техникалық-экономикалық негіздемесінің негізгі нәтижелерін таныстырды. Құжатта болашақ университеттің тұжырымдамасы, академиялық моделі, ғылыми зерттеулердің басым бағыттары, факультеттер құрылымы, білім беру бағдарламалары, сондай-ақ жобаның экономикалық тиімділігі мен ықтимал тәуекелдеріне жүргізілген талдау қамтылған.
Таныстырылым аясында қатысушылар зерттеу нәтижелерін талқылап, жобаны іске асырудың келесі кезеңдері мен негізгі басымдықтарын айқындады.
Мамандардың айтуынша, техникалық-экономикалық негіздеменің сәтті аяқталуы Қазақстан мен Корея Республикасы арасындағы бірлескен бастаманы жүзеге асырудағы маңызды кезең болып саналады. Құжат жобаның академиялық және экономикалық тұрғыдан жоғары әлеуетке ие екенін растап, болашақ ғылыми-білім беру кластерінің негізгі параметрлерін, заманауи кампус салу кезеңдерін және халықаралық деңгейдегі инженерлік кадрларды даярлау моделін айқындайды.
KAIST филиалының Alatau City-де ашылуы Қазақстандағы жоғары білім мен ғылым саласын дамытуға бағытталған стратегиялық жобалардың бірі болмақ. Жоба халықаралық ғылыми-технологиялық орталық қалыптастыруға, ғылыми зерттеулерді дамытуға, инновациялық технологияларды коммерцияландыруға, әлемнің жетекші университеттерімен ынтымақтастықты кеңейтуге және Қазақстан мен Орталық Азия үшін жоғары білікті инженерлік мамандар даярлауға мүмкіндік береді.
