«Биыл облыс аумағында кәмелетке толмаған 8 бала өз-өзіне қол жұмсады, ал суицидке қадам жасаудың 3 дерегі тіркелді. Ата-аналық міндеттерін тиісті орындамаған 297 адам ҚР ӘҚБтК-нің 127-бабына сәйкес, әкімшілік жауапкершілікке тартылса, 2 тұлға ата-аналық құқықтарынан айырылып, 1 тұлғаның ата-аналық құқығы шектелген», — деді отырыста жергілікті полиция қызметі басқармасы бастығының орынбасары Айдын Қалиев.
Оның айтуынша, жоғарыда аталған жайсыз оқиғалардың алдын алу үшін аудан, қалаларда ювеналдық полиция өкілдері білім беру органдарының қызметкерлерімен бірлесіп, 71 рейдтік іс-шара өткізген.
«Арнайы қабылданған іс-шаралардың нәтижесінде кәмелетке толмағандар арасындағы қылмыстың алдын алуға әсер ететін 637 құқық бұзушылық анықталып, жолы кесілді», — деді Айдын Қалиев.
