Бұл туралы Алматы облыстық төтенше жағдайлар департаментінің баспасөз қызметі мәлім етті.
Оқу-жаттығуға төтеншеліктерден бөлек, орман шаруашылығы мекемелерінің мамандары, еріктілерден құралған «Табиғат» өртке қарсы құрылымдары қатысты.
«Алматы облысында орман өрттері мен құрғақ шөптердің өртенуіне қауіпті маусым сәуірден қарашаға дейін жалғасады», — деп жазды баспасөз қызметі.
Баспасөз мамандарының мәліметінше, өрттің алдын алу, анықтау және жою үшін әуе бөлімшелері мен жердегі өртке қарсы қызметтер жұмылдырылады. Ал оқу-жаттығу кезінде жерді зерттеу, су айдындарының орналасқан жерін қайта анықтау, өртке қарсы тосқауылдар жасау секілді бірқатар іс-шаралар пысықталды.
«Сондай-ақ төтеншеліктерге өрттің түріне байланысты оны оқшаулау және жою бойынша бірнеше әдістері үйретілді. Мысалы, өртеніп жатқан аумақтың шетіне топырақ төгу, сумен сөндіру, бөгеу жолақтарын төсеу. Кез келген жер қызыл жалынға оранған сәтте ең маңыздысы — алғашқы шешімді дұрыс қабылдау», — делінген ақпаратта.
Айта кетейік, облыста орманның жалпы ауданы 3,2 млн гектар. Өңірде орман өртіне қауіпті үш аудан бар: Балқаш, Іле, Ұйғыр аудандары.
