Осы күндері ауруханаға 58 жастағы науқас қатты бел ауруы мен қозғалыстың шектелуі шағымымен түскен. Оның айтуынша, әр қадам ауырлық тудырып, күнделікті өмірі бірнеше метр ғана ауырсынусыз жүрумен шектелген.
Мамандар жүргізген кешенді диагностикалық тексерулер нәтижесінде спинальды стеноз анықталған. Бұл – омыртқа арнасының тарылуы салдарынан жұлын мен жүйке тамырларының қысылуы. Дәрігерлердің айтуынша, уақытылы хирургиялық араласусыз мұндай жағдай ауыр неврологиялық асқынуларға және мүгедектікке әкелуі мүмкін.
Осыған байланысты дәрігерлер шұғыл шешім қабылдап, МӘМС шеңберінде науқасқа омыртқа арнасының микрохирургиялық декомпрессиясы және гипертрофияланған байламды алу операциясын жасаған. Бұл – күрделі болғанымен, жоғары тиімділігімен ерекшеленетін хирургиялық араласу.
Операцияны жоғары білікті нейрохирург, омыртқа патологияларын емдеудің заманауи микрохирургиялық әдістеріне маманданған Марат Римұлы Гизатуллин орындаған. Ал ота барысында наркоз жүргізіп, науқастың жағдайын тұрақты бақылауда ұстаған реаниматолог-анестезиолог дәрігер Рият Айсамжанұлы Бакриев болған.
Дәрігерлердің үйлесімді әрі кәсіби жұмысы операцияның қауіпсіз өтуіне ықпал етіп, асқыну қаупін төмендетіп, қалпына келу процесін жеделдеткен.
Операция сәтті өтіп, бірнеше күннен соң науқас ауырсынудың айтарлықтай азайғанын және жалпы жағдайының жақсарғанын сезінген. Қазіргі уақытта ол дәрігерлерге ерекше алғыс білдіріп отыр.
«Осындай күрделі операцияның Қонаевта жасалатынын күтпедім. Марат Римұлына, Рият Айсамжанұлына және аурухананың барлық ұжымына кәсібилік пен ілтипаттылықтары үшін үлкен алғыс айтамын», – дейді науқас.
Мамандар бұл жағдай өңірлік медицинаның дамуының нақты көрінісі екенін атап өтеді. Қонаев қалалық көпсалалы ауруханасы бүгінде заманауи құрал-жабдықтармен, жоғары білікті кадрлармен және жоғары технологиялық медициналық көмекті көрсету мүмкіндіктерімен толық қамтамасыз етілген.
Енді Алматы облысының тұрғындары сапалы медициналық көмекті өз өңірінде ала алады. Бұл ұзақ күтуге, басқа қалаларға шығынды сапарларға шығуға қажеттілікті азайтып, науқастарға жергілікті деңгейдегі жоғары білікті мамандарға сенім артуға мүмкіндік береді.
