Құжатта қатты жел салдарынан қала аумағындағы бірқатар көпқабатты тұрғын үйлердің шатырлары зақымдалып, ұшып кеткені көрсетілген. Осыған байланысты Қонаев қаласында жергілікті деңгейде табиғи сипаттағы төтенше жағдай режимін енгізу ұсынылып отыр.
Төтенше жағдай режимі енгізілген жағдайда қала билігіне келесі жұмыстарды жедел жүргізуге мүмкіндік туады:
-
тұрғын үйлер мен ғимараттардың шатырларын қалпына келтіру;
-
істен шыққан көше жарығы тіректерін ауыстыру;
-
темірбетон тіректер мен электр желілерін жөндеу.
Аталған шешім жобасы 16 желтоқсанға дейін «Ашық нормативтік құқықтық актілер» интернет-порталында қоғамдық талқылауға шығарылған.
Бұған дейін, 11-інен 12 желтоқсанға қараған түні Қонаев қаласында желдің жылдамдығы секундына 23–25 метрге дейін жеткені хабарланған. Қолайсыз ауа райының салдарынан қалада 30-дан астам төтенше жағдай тіркелген. Қатты жел электр қуатының өшуіне, шатырлардың ұшып кетуіне, ағаштардың құлауына және инженерлік желілердің зақымдалуына себеп болған. Сондай-ақ жылумен қамту жүйесінде іркілістер байқалып, жеке тұрғын үйлердің бірінде өрт шыққан. Бұдан бөлек, саяжай алқаптарында да бірқатар апаттық жағдайлар орын алған.
