Аталған үй апатты деп танылып, «Реновация» бағдарламасына енгізілген болатын. Бағдарлама аясында көпқабатты үйдің тұрғындары бұған дейін өз пәтерлерінен көшіріліп, оларға жаңа баспана сатып алу үшін бюджеттен қаражат бөлінген. Конкурстық рәсімдер қаладағы ТҮКШ бөлімі арқылы жүргізілді.
Қазіргі таңда бұл үйде тек бір пәтерде зейнеткер тұрып келген. Абырой болғанда, өрт оның пәтеріне жетпей, зақым келтірмеген.
Оқиғадан кейін Қонаев қаласының әкімі Асхат Бердіханов зейнеткерді қабылдап, алдағы уақытта атқарылатын шаралар туралы мәлімет берді. Шаһар басшысының айтуынша, зейнеткердің қазіргі пәтерінің орнына басқа тұрғын үй кешенінен жаңа пәтер сатып алынып, заң аясында рәсімделіп беріледі.
Бүгінде зейнеткер туыстарының үйінде уақытша тұрып жатыр. Пәтердің кілті табысталған сәтте қосымша ақпарат жарияланатын болады.
Қазіргі уақытта өрттің шығу себебі анықталуда. Төтенше жағдайлар қызметі тұрғындардың қауіпсіздігін қамтамасыз ету үшін тиісті тексеру жұмыстарын жүргізіп жатыр.
