Қабылдау барысында қала тұрғындары кәсіпкерлік нысанын салуға жер учаскесін бөлу, сондай-ақ баспана мәселесіне қатысты сұрақтарымен жүгінді.
Әкімнің айтуынша, заңнамаға сәйкес бизнес мақсатындағы жер учаскелері аукцион арқылы беріледі және бұл процеске кез келген азамат қатыса алады. Шаһар басшысы аукцион тәртібі мен талаптарын түсіндіріп, жиһаз цехын ашуға арналған жер телімдерін ауылдық аумақтардан қарастыру мүмкіндігі бар екенін атап өтті.
Сонымен қатар қабылдауға келген тұрғындардың бірі «Отбасы банк» АҚ арқылы баспана сатып алу кезінде құжат рәсімдеуде қиындықтар туындағанын жеткізді. Әкімнің тапсырмасымен бұл мәселе бойынша қалалық әкімдіктің заң бөлімі мамандары көмек көрсететін болды.
Тағы бір тұрғын — зейнет жасындағы әжей пәтерге кезекке тұру мәселесін көтерді. Бұл сұрақ та назардан тыс қалмай, тиісті мамандарға тұрғынға толық сүйемелдеу көрсету тапсырылды.
Қабылдау қорытындысы бойынша көтерілген барлық мәселелер хаттамаға енгізіліп, орындау үшін қала әкімдігінің тиісті бөлім басшыларына жолданды.
