Ведомство мәліметінше, қазіргі уақытта Қарулы күштердің әскери басқару органдары мен әскери бөлімдеріне жоспарлы тексеру жүргізіліп жатыр. Соған орай 16–18 ақпан аралығында Алматы, Қонаев және Талдықорған қалаларында әскери техниканың қозғалысы ұйымдастырылады.
Министрліктің баспасөз қызметі кейбір автожол учаскелерінде уақытша қозғалыс шектеулері енгізілуі мүмкін екенін ескертті.
«Осы кезеңде аталған қалаларда әскери техниканың жоспарлы орын ауыстыруы жүзеге асырылады», – деп хабарлады Қорғаныс министрлігі.
Сонымен қатар, ведомство қазақстандықтарды, БАҚ өкілдері мен әлеуметтік желі қолданушыларын тек ресми ақпарат көздеріне сүйенуге және жалған мәліметтерге сенбеуге шақырды.
