Брифингте бірқатар қордаланып қалған мәселелер талқыланды. Мысалы, Елтай, Көлді, Мерей, Нұрбағы ауылдарында автобустардың сапасы сын көтермейді.
«Мерей, Көлді, Жалпақсай ауылынан Қаскелеңге қарай халықты автобуспен «Қаскелең» автопаркі қамтамасыз етуі қажет. Алайда, қазіргі таңда бұл компанияның оған шамасы келмей отыр. Сондықтан мемлекеттік сатып алу бойынша конкурс ойнатылады. Оған Алматы қаласындағы компаниялар қатысуға ниетті», — деді аудан әкімі.
Оның айтуынша, серіктестіктерге автобус ішінде электронды төлем жасайтын қондырғысының орнатылуы және жаңа көліктерді қолданысқа беруі қажеттілігі жөнінде талап қойылған. Аталған электронды жүйенің негізінде компанияға субсидия төленетін болады.
Сонымен қатар әкім биыл қыркүйекке дейін Қаскелең — Айтей, Қаскелең — Жандосов, Қаскелең — Исаев, Батан — Алтын Орда және Тұрар — Алтын Орда бағытындағы бес жаңа автобус бағыты ашылатынын айтты. Ал бұған дейін «Қаскелең (СДУ) – Алматы» бағытында №230, «Көлащы – Елтай — Алматы» бағытында №213 маршруттары іске қосылған. Сонымен қатар сәуір айынан Қаскелең қалаішілік №1 «Сәукеле — Теремки» және №2А «Автобекет — Арман саяжайы» бағыттарындағы екі маршрут жүре бастаған.
