«Агроөнеркәсіп кешені саласында бұл аудан жалпы өнім көлемі бойынша көшбасшылардың бірі. Бұл аумақтың облыстағы үлесі 12% немесе 88,5 млрд. теңге. Ауыл шаруашылығы дақылдарының жалпы егіс алқабы 28,5 мың гектарды құрап, картоп және көкөніс өндіру бойынша облыста үшінші орында тұр», — деді облыс әкімі.
Марат Сұлтанғазиевтің мәліметінше, АӨК саласында жақсы көрсеткіш болғанымен былтыр ауыл шаруашылығы дақылдарының егіс алқабы өткен жылмен салыстырғанда 350 гектарға азайған.
Сонымен қатар өңір басшысы ауданда жалпы алаңы 24,5 га, өнімділігі жылына 8 мың тонна болатын 8 жылыжай бар, бірақ оның 2-уі жұмыс істемейтінін айтты.
«Ауыл шаруашылығын қолдауға облыста жыл сайын 30 млрд. теңгеден астам субсидия бөлінетінін атап өткім келеді. Өткен жылы Қарасай ауданының 108 шаруа қожалығына 527 млн. теңге бөлінді. Тұқым шаруашылығын дамытуға 6 шаруашылық бір миллион теңгеден астам қаражат алды. Биыл көктемгі дала жұмыстарына 300 тонна дизель отыны бөлініп, 500 тоннаға қосымша өтінім берілген», — деді өңір басшысы.
