Брифинг барысында тілшілер әр көлікке 5000, адам басына 1500-2000 теңге алатын, бірақ еш жағдайы жасалмаған, құтқарушысы жоқ жағалаулар туралы мәселе көтерді. Шаһар басшысының айтуынша, бұл түйіткіл қала әкімдігінің жіті бақылауында. Мемлекет меншігіне жағалаудағы 42 жер телімі қайтарылады.
«Кезінде заман кішкене басқаша болып, жағажайлардың көбі жекеменшікке өтіп кеткен. Қазіргі таңда жағалаудағы 42 жер телімін мемлекеттік меншікке қайтару жұмыстары жүріп жатыр. Жер иелеріне 90 күн алдын ала хабарлама берілді. Мемлекеттік акт шығып, құжаттары түгел болған соң, мәселе тек сот арқылы шешілмек. Бүгін де облыстық сот мамандарымен осыны талқыладық», — деді Нұрлан Құматаев.
Қонаев қаласының әкімі биыл еш заңсыздықтар орын алмайды — деп сендірді. Бұдан бөлек, ол ойынханалар жағалай орналасқан Индустриальная көшесіндегі бос, пайдаланылмай жатқан жер телімдері де мемлекетке қайтарылғанын айтты.
«Қазір қалада әлеуметтік, мемлекеттік органдардың нысандарын көптеп салу керек. Тұрғындар саны күннен күнге артып келеді. Ал жерді сатып алу үшін бір тиын да бөлініп отырған жоқ. Сондықтан жер иелерімен келіссөздер жүргізіп жатырмыз», — деді қала әкімі.
